A divulgación do saber facer dos profesionais da artesanía galega reflíctese na organización e colaboración en diferentes exposicións. Entre as mostras máis destacables:

Pensar  coas  mans. Cestería, cerámica e  xoiería de Galicia, organizada pola Consellería de Cultura e celebrada na Cidade da Cultura de Galicia no 2019.  Comisariada por Verónica Santos e montaxe de  Izaskun Chinchilla, a exposición dirixiu o foco cara a estas tres especialidades, nunha viaxe desde o século XXI á Idade de Ferro. A mostra ofreceu unha visión renovada da artesanía, non só como gardiá de oficios en perigo de desaparecer, senón formulando unha idea de futuro que fala da beleza dos materiais naturais e da capacidade dos obxectos para expresar a nosa identidade. A Fundación formou parte do comité asesor e organizou diferentes talleres de formación e demostracións. 

A Fundación Centro  Galego dá Artesanía e  do  Deseño organizou a exposición Bosques de prata, na Casa  do Cabido de Santiago de Compostela no 2015, como unha homenaxe a un dos ourives máis relevantes para a capital galega e unha das figuras máis representativas da artesanía contemporánea en Galicia. Gran coñecedor do oficio, Eloy Gesto dedicou a súa vida para traballar coa tradición ourive, revisala e renovala constantemente a través de pezas máis persoais e experimentais como as que se recollen na mostra. Bosques de  prata ofrece a oportunidade de coñecer a súa obra máis íntima e experimental, na que a figura do artista está máis presente que nunca. Eloy Gesto, o artesán, o artista, foi tamén o divulgador da artesanía e un dos responsables de dar un impulso decisivo á ourivaría compostelá. 

Dentro do programa Artesanía de Galicia. O teu Camiño a Fundación organizou dúas exposicións de proxectos de Artesanía & Deseño, financiados pola Consellería de Economía e  Emprego: a exposición  Auga foi o resultado da colaboración entre a Asociación de Artesáns da Terra Chá e o estudo de deseño Vermis Project. Estivo formada por unha colección de produtos inspirados na Terra Chá onde o elemento central é a auga, a cal interactúa de diferentes maneiras con cada unha das cinco pezas que a compoñen e serve como fío argumental do proxecto. En cada unha das pezas conxugábanse as técnicas e o saber facer dos diferentes oficios artesáns da Chaira coa metodoloxía do Design  Thinking achegada polos deseñadores. A exposición Artesanía de Galicia para vivir o século  XXI foi un proxecto de colaboración entre a Asociación Galega de  Artesáns (AGA) e o estudo de deseño Fruto DS que suma ao valor emocional do oficio artesán unha actualización dos obxectos, co obxectivo de dinamizar comercialmente o sector. Unha serie de proxectos de deseño, que conseguen mesturar o coñecemento, a metodoloxía e a creatividade de artesáns e deseñadores. 
Ambas as exposicións tamén se mostraron no Corazón da Artesanía. V  Encontro da Artesanía Tradicional e Popular de Galicia nos Pendellos de Agolada no 2016.

A exposición itinerante Contornos, organizada durante moitos anos por Artesanía de Galicia a partir das pezas seleccionadas anualmente polos propios artesáns participantes no Encontro de Torneiros da Madeira de Xermade, percorreu numerosas localidades galegas. O obxectivo da mostra era contribuír á divulgación do  torneado de madeira e promover novos usos e deseños vinculados á decoración, á arquitectura ou á arte contemporánea. 

Baixo o título Encadernando presentouse na Coruña, en Santiago de Compostela e na Pobra do Caramiñal, unha escolma de pezas e de creadores da encadernación coa que se mostraba a gran diversidade existente deste oficio en Galicia. Unha mostra dedicada ao coidado envoltorio no que se pode presentar unha obra de arte, unindo así literatura e artesanía. 

A exposición Tesouros Privados. A  xoiería en Galicia, comisariada por María García Alén e organizada pola Fundación presentouse no Pazo de Fonseca de Santiago de Compostela os meses de setembro e outubro de 2010 e na cidade de Vigo durante os meses de abril e maio de 2011. A través de 200 pezas elaboradas por 38 autores, abordou en profundidade a xoiería galega e a súa evolución desde a xoiería tradicional ata as coleccións máis innovadoras caracterizadas pola introdución de novos materiais e das últimas tendencias do deseño.