Benvidos á páxina de Artesania de Galicia.

Documentación

A Xunta de Galicia pon de manifesto o seu compromiso co desenvolvemento do sector artesán xa no ano 1992, no que se publica a Lei de Artesanía de Galicia. A partir dela, o marco legal deste sector foise desenvolvendo con outras actuacións entre as que destaca a creación da marca Artesanía de Galicia, como símbolo e imaxe dos profesionais galegos nos mercados de dentro e de fóra do país.

A Dirección Xeral de Comercio desenvolve unha serie de actuacións no eido da artesanía destinadas a difundila e a revitalizala como sector económico de peso – que xera riqueza e emprego, que supera as fronteiras para comercializar os seus produtos – como elemento de preservación da tradición e da cultura e como reclamo turístico.

Para cumprir con estes obxectivos establece liñas de axuda económica tanto para obradoiros como para asociacións profesionais, apoia a formación continua dos profesionais, a creación de empresas, potencia a innovación e a incorporación do deseño ao sector artesán, a formación continua, a especialización e a actualización dos artesáns, ao tempo que se promove a orientación comercial e a proxección internacional do sector a través da marca Artesanía de Galicia e da súa participación en feiras profesionais de recoñecido prestixio.

Os interesados poderán obter información detallada sobre estas liñas de actuación da Dirección Xeral de Comercio nos apartados dedicados á lexislación, ás axudas e mais ás publicacións institucionais que se poden atopar nesta sección.